మీలో ఒకడిగా వస్తున్నా... మీరే నా భరోసా
* సినీ యాక్టర్ హర్ష చెముడు ( వైవా హర్ష)
*విజ్ఞాన్ మహోత్సవ్లో ‘‘ సుందరం మాస్టర్’’ యూనిట్ సందడి
టాలెంట్ ఎక్స్ ప్రెస్ న్యూస్:
విజ్ఞాన్స్ విద్యాసంస్థలో ఇంజినీరింగ్ పూర్తి చేసిన నేను... సినీ హీరోగా మీ ముందుకు మీలో ఒకడిగా వస్తున్నాని, మీరే నా భరోసానని సినీ యాక్టర్ హర్ష చెముడు (వైవా హర్ష) అన్నారు. చేబ్రోలు మండలం వడ్లమూడి విజ్ఞాన్స్ యూనివర్సిటీలో జరుగుతున్న జాతీయస్థాయి విజ్ఞాన్స్ మహోత్సవ్–2కే24లో భాగంగా రెండో రోజు ‘‘ సుందరం మాస్టర్ ’’ సినిమా యూనిట్ సందడి చేసింది. సినిమా ప్రమోషన్స్లో భాగంగా హీరో హర్ష చెముడు, డైరక్టర్ కల్యాణ్ సంతోష్, మ్యూజిక్ డైరక్టర్ చరణ్ పాకాల, ప్రొడ్యూసర్ సుధీర్లు విజ్ఞాన్స్ మహోత్సవ్కు విచ్చేసారు. కార్యక్రమానికి ముఖ్య అతిథిగా హాజరైన సినిమా హీరో హర్ష చెముడు మాట్లాడుతూ విద్యార్థులు ఏదైనా కొత్తగా ప్రయత్నించాలంటే గ్రాడ్యుయేషన్ సమయయే సరైనదన్నారు. తాను ఇంజినీరింగ్ చదివేటప్పడు ఏదో ఒకరోజు నేను కూడా ఇలాంటి కార్యక్రమాలకు ముఖ్య అతిథిగా రావాలని అనుకున్నాను. 10 సంవత్సరాల తర్వాత నేను మీ ముందుకు అతిథిగా రాగలిగానని వెల్లడించారు. మీ మీద మీకు నమ్మకం ఉండాలని, మీకు ఏది అనిపిస్తే అదే చేయాలన్నారు. ఒకేసారి పెద్ద పెద్ద లక్ష్యాలను ఎంచుకోకుండా.... మొదట చిన్న చిన్న లక్ష్యాలను నిర్ణయించుకుని... తర్వాత తర్వాత పెద్ద లక్ష్యాను నిర్దేశించుకోవాలని విద్యార్థులకు సూచించారు. తన సినీ జీవితంలో ఇంకా సాధించాల్సింది చాలా ఉందని విద్యార్థులకు తెలియజేసారు. విద్యార్థులందరూ సుందరం మాస్టర్ సినిమాను ఆదరించి అఖండ విజయాన్ని అందించాలని కోరారు. డైరక్టర్ కల్యాణ్ సంతోష్ మాట్లాడుతూ బ్యాక్ బెంచ్ విద్యార్థులకు, తోటి స్నేహితులకు సపోర్ట్గా నిలిస్తే... వారు ఏదో ఒకరోజు అద్భుతాలు సృష్టిస్తారని పేర్కొన్నారు. ఈ సినిమా తన మనసుకు బాగా దగ్గరైన సినిమానని తెలియజేసారు ఈ సినిమాలో కామెడీ, ఎమోషన్స్, డ్రామా ప్రేక్షకులందరికీ నచ్చుతాయన్నారు. ఈ సినిమాలో తన పాత్ర ఇప్పటివరకు చేసిన పాత్రల కంటే వైవిధ్యభరితమైనదని తెలియజేసారు. అనంతరం సుందరం మాస్టర్ సినిమా యూనిట్ విద్యార్థులతో సెల్ఫీలు దిగారు.